Achtergroond
…EFFE VUUERSTELLE…
As ich binne loup in de kleine, mêr ziêker hoeegwaardige rippetisieruuemdje van de Bônte Aovundj Bênd (BAB), ergus in in zi-jstraot oppe Beêst, veltj mich drêk ut fanatisme van de Bêndlede op. De rippetisie begint um 8 oor mêr um viêf op 8 is alles al geïnstalieerdj. Ut volledig drumstel van Maarten. Ut Keybôrd en alle toeters en belle van Jan. Alles stieet al klaor. Zellufs de koffie is broên…
Mer weem zeen di-j jôngus eigenlik ?? As dejje (vastelaovuntj)meziêkleefhebber zeetj, dan hejje diees kornuiten vast al ês ergus gezeen. Mêr ut aafgeloupe jaor hebbe vae ze beej elkaar gebracht. Înkel jaore gelieeje kwoom vanuut de Bônte Aovuntj artieste groep al de roop vör “live” muziek. Nao jaore op un geweldjige meneêr gewerriktj te hebbe met bandmeziêk, woore ze dao rieëp vör. En nao unne zeuktocht nao de zjuûste minse kwoome ze uut beej diees 4 kanjers.
John Stroek, gitarist, dae es al wat langer actief oppe Bônte Aovuntj. 5 Jaor gelieeje maaktje John al zieene êntree-j. Hae hieet diees ieerste jaore vuueral Ivonne Hendriks en Ed Stroek begeleidj beej de geveulige nummers. En ôngelooge mer woor… eedere aovuntj mos John weer bäöke nao zieen optrei-je. Op de vraog of John dan zooe’ne geveulige jông ês, antwoeerdj John ; “Nein.. mer eeders kieer as ich nao mieen optrei-je trök kwoom inne kleidkamer haaj eemes mieen vol fles beer lieeggezoeepe. Jeh, en dan bin ich hum kepot te valle. Vêrkes zeentj, di-j Bônte Aovuntj artieste….. Mer jeh. Ich doontj uut leefdje vör de mezieek heh“. John ki-jae ziêker aug âs gitarist van Tsjeh Tsjeh Tsjeh, en vör de minse met un baeter geheuge as muzikant op de Bônte Aovuntj van Luuëke en as artiest van de Bônte Wichtermiddug van de Rogstaekers in de jaore ’80 en ’90. John hieet trouwes zellufs als solo-artiest op Bospop gestânge in de begin jaore ’80… Aug ês hae vör Erik Fikken hieel errug belangrieëk gewaesj vör ut schrieeve van de meziêk van zieen leste CD “Hallo”. De roze klei-jer van Tsjeh Tsjeh Tsjeh hieet hae inmiddels doeergegaeve; Dit veel helaas neet mieer te kombinieere met de Bônte Aovuntj ; “Vae gaon eedere donderdig en vriêdig met de BAB op stap en de di-j ânger daag rippetieere vae….dus….”.
Dae ângere gitarist (mer dan met 4 snaore) is Frankie Tuasuun. Frankie is geboeere Surinamer en ês as ein van de ieerste bolletjesslikker in de bak van Remundj terechtgekaome. Nao un waek es hae dao-uut ontsnaptj en zoeedoondje in Wieert gelandj. Want as dejje uut Remundj wiltj ontsnappe dan zeejjae in Wieert altieed welkom !! Hae hieet zich mettegang ut dialekt meister gemaaktj en kaltj nao dan aug Plat Groenewouds. Met as gevollug det zieene zoeen Yaël jeugdpreens woord beej de Schäöpkes. : “As ich dao aan trök, scheet mich de traone weer in mieen auge. Det ês ut schoeenste waat uch kin oeeverkaome…onsnappe uut Remundj..”.
Frankie hieet ôngertösse aug al 2 jaor Bônte Aovundj dör op zitte; “Det klopt, ut ieerste jaor um John Stroek te vervange, want dae hieet un jaor neet met kinne doon, umdette zoee giftig waas det ze um eeders kieer zieen beer opzoeepe, dette dao unne Burn Out van hieet opgeloupe. Ich neem mieen beer altieed nao de bühn, en aangezeen ich al in de bak gezaete heb, durve ze toch neet aan mieen beer te kaome”. Frankie ês aug nog bassist van de Top 40 Bênd ‘DaVinci” en di-j ki-jae met Weert Swingt weer zeen beej keffee de Hermeni-j.
Un ânger lid van “DaVinci” es de drummer van de Bênd. Maarten Moris. Un hieel klein irritant mênneke. As dör iets gebuuertj ês in de kleidkamer, of eemes hieet eur beer opgezoeepe, dan ki- jae dör gif op in neeme, det Maarten det gedaon hieet. Hae zieet wul dette gein beer lösj mer stiekum zuuptje alle klatse op. Zieen antwoeerdj heej op ; “Ich lös gein beer“. Zeejjae waal. Hieel iritant mênneke… Mer je un bênd zoônger drummer es as un fles beer, zoônger beer…
Maarten hieet vuuërig jaor vör ut ieerst zieen gezicht laote zeen oppe Bônte Aovundj. Hieel entoesjast kwoom hae eeders kieer trök in de kleidkamer en zag dan : “Ich lös gein beer”. As dejjae straks nao de vuuerstelling in de foyer staotj en gae zeetj det eur glaas beer in eine kieer lieeg es, kieektj dan um uch haer en gaotj op zeuk nao un mênneke met 2 stêkskes in zieen hang…..
”Ich lös gein beer”… waat unne zeiver…
Ut leste muzikaal talent es Jan ‘de Trekzak’ Rutjens. Mutifunctioneel toetsewônger. Jan es 2 jaor gelieeje oppe Bônte Aovuntj gevraogdj um Ton Adriaens te begeleiden op zieene Trekzak . Det waas un geweldjig sukses en Jan waas heej nao hieel entoesjast ; “Dit es schoeenste waat mich es oeeverkaome sinds ich gestoptj bin met de Kermisklanten.”. De mieeste minse kinne Jan misschieens van de Bônte Aovundj van Bosseve of van Smartlappenkoeer “Merg en Bein” mer ver daovuuer waas Jan te zeen (met snor) beej de Kermisklanten. As dejje heej kliktj ki-jae nog un aod filmke trök zeen Jan. (Jan es dae met dae snor). (Klikke met de rechter moeesknop en oeepene in nôw venster)
Diees 4 manne zeen uuteindelik beej mekaar uutgekaome en vorme de BAB sinds de aafgeloupe Bônte Aovundj van 2009. Ich zooj allein nog wille zegge; Kotj ze kaomendj jaor oppernoeets aanschouwe oppe Bônte Aovundj, want zônger mezieek …… geine Bônte Aovundj
